MANILA, Philippines - Namatay habang nilalapatan ng lunas sa ospital ang isang pulis nang barilin ng isang holdaper na nangholdap sa isang pet clinic sa Bacoor City, Cavite kamakalawa.
Ang nasawi ay kinilalang si PO3 Joel Pelayo, 38, nakatalaga sa NAIA Cargo, Terminal 1 at residente ng # 99 Tabing Ilog, Brgy. Aniban 2, Bacoor City.
Batay sa ulat, dakong alas-11:30 ng umaga ay pinasok ng dalawang lalaki na nagpanggap na customer ng Dr. G Animal Clinic na nasa Tirona Hi-way, Brgy. Habay 2, Bacoor City, Cavite na nagkataong kustomer ang biktima.
Ilang sandali ay nagdeklara ng holdap ang dalawang suspek, subalit nanlaban ang biktima kaya’t pinagbabaril siya ng mga suspek.
Natangay ng mga salarin sa isang kustomer na si Manny Saulog, 55, club manager, ang isang wrist watch; dalawang gold bracelet at wallet na naglalaman ng cash at iba pang personal na gamit at pagkatapos ay tumakas.