MANILA, Philippines – Kinarit ni kamatayan ang apat katao habang lima pa ang nasugatan kabilang ang dalawang nasa kritikal na kondisyon makaraang aksidenteng mabangga ang sinasakyan ng mga itong van ng isang tanker sa kahabaan ng Tplex sa Anao, Tarlac nitong Sabado ng madaling araw.
Sa inisyal na ulat ni Sr. Inspector Manolito Handoc, Chief of Police ng Anao naitala ang malagim na sakuna bandang alas-4:30 ng madaling araw sa nasabing lugar habang patungo ang mga biktima sa Baguio City para magbakasyon matapos na i-treat ng kanilang kamag-anak na galing Amerika.
Ayon kay Handoc, tatlo sa mga biktima ay dead-on- the-spot habang isa pa ang binawian naman ng buhay sa pagamutan.
Kinilala ng opisyal ang mga nasawi na sina Marilyn Arellano, 52 anyos, Kimberly Rose Arellano, 17; Cristelle Arellano, 16 at Crissele May Arellano, 15 anyos.
Patuloy namang isinasalba ang buhay sa pagamutan ang lima pang nasugatang biktima kabilang ang dalawang nasa malubhang kalagayan.
Nabatid na magkasunod na bumabagtas sa Tplex ang tanker na minamaneho ni Remegio Cayanan Jr. sa sinasakyang van ng mga biktima na sinalpok ng dambuhalang behikulo na umano’y nawalan ng kontrol sa preno ang driver.
Sa lakas ng pagkakabangga ay tumilapon ang van na nakaladkad pa ng tanker ng ilang metro at natanggal ang bubungan sa insidente na ikinasawi at ikinasugat ng mga biktima. Isinailalim naman sa kustodya ng pulisya ang driver ng tanker na nahaharap sa kasong kriminal.