MANILA, Philippines - Dead on the spot ang dalawang katao habang nasa 13 ang nasugatan matapos sumabog ang dinamita sa loob ng isang bahay sa Sitio Lungan Gintong, Barangay Busbus, Jolo, Sulu, kamakalawa.
Ang mga nasawi ay kinilalang sina Aldea Tating at si Kabir Laho, ang may-ari ng bahay na siyang nanguna umano sa paggawa ng dinamita.
Ilan sa mga nasugatan ay kinilalang sina Kamliya Spaldon, 60; Menariya Elasan, 42, Jeba Tating, 27; Neba Janji, 15; Nashra Baani, 12; Alnica Tating, 16; Fadzrina Tating, 6; Darwin Tating, 5; at Aifha Tating, 5.
Sa ulat ni Supt. Julpikar Sitin, hepe ng Jolo Municipal Police Station, bago nangyari ang pagsabog dakong alas-8:30 ng umaga ay gumagawa ng dinamita sa loob ng isang bahay nang aksidente itong sumabog.
Sa pagsisiyasat ng mga otoridad sa loob ng bahay kung saan nangyari ang pagsabog ay narekober pa dito ang nasa limang sako ng ammonium nitrate na pangunahing sangkap sa paggawa ng dinamita at iba pang klase ng improvised explosive device (IED).
Ginagamit umano ang mga ginagawang dinamita ng magkakamag-anak sa ilegal na pangingisda sa lugar.