MANILA, Philippines – Bagsak sa kulungan ang isang tsuper nang ito ay arestuhin matapos itong magbiro na may bomba ang kanyang dalang bag dahilan upang mag-panic ang mga pasahero sa istasyon ng Light Rail Transit (LRT) 1 sa Pasay City kahapon ng umaga.
Ang suspek na nasa kustodyan na ng pulisya ay kinilalang si Rudy Gaid Jr., 35, may asawa, nakatira sa #5527-B, panulukan ng Dallas at Binay Sts., Barangay Bangkal, Makati City.
Sa ulat, bago inaresto ang suspek dakong alas-6:05 ng umaga sa EDSA Station LRMC Line-1 ng lady guard na si Jenesa Pradilla ay dumaan si Gaid na may dalang bag at nagsisigaw ito na may lamang bomba ang kanyang bag, dahilan upang magtakbuhan ang mga pasahero ng LRT sa takot. Subalit, nang malamang nagbibiro ang suspek, ay dinakip ito ni Pradilla at dinala sa himpilan ng pulisya at inihahanda na ang kasong isasampa dito.