MANILA, Philippines – Isang itim na garbage bag na may lamang bangkay ng hubo’t hubad na lalaki ang natagpuan kahapon ng madaling araw sa EDSA kanto ng NIA Road, Quezon City.
Inilarawan ng mga pulis ang biktima na nasa pagitan ng edad na 25-30, may taas na 5’1”, may mga tattoo sa katawan tulad ng “Federico Dasig, “Cesar Macao”, “Raprap” at “Onyok” na may mga saksak ng ice pick sa katawan, nakabalot ng packaging tape ang mukha na may nakapatong na kulay puting tuwalya at nakagapos din ang mga kamay.
Sa ulat, dakong alas-2:00 ng madaling araw ay naglalakad ang dalawang binatilyo sa kahabaan ng EDSA at pagdating sa kanto ng NIA Road ay nakita nila ang nasabing garbage bag.
Sa pag-aakalang may makukuhang mapapakinabangan ay pinagsisipa ito hanggang sa lumitaw ang isang ulo ng tao dahilan para agad silang magtatakbo at ipagbigay sa mga nagpapatrulyang pulis mula sa Kamuning Police Station.
Hinala ng mga otoridad na posible umanong kapapatay lang ng biktima ng madiskubre ito dahil sariwa pa umano ang dugo na umaagos mula sa mga sugat ng saksak nito sa kanyang dibdib.