MANILA, Philippines – Inatake ng nasa 30 rebeldeng New People’s Army (NPA) ang isang banana plantation na kung saan ay nasawi ang isang sekyu at pagkasugat ng limang sundalo na naganap kahapon ng madaling araw sa Brgy. Kipalbig, Tampakan, South Cotabato.
Ang nasawing sekyu ay kinilalang si Melchor Galamgan, ng RSAF Security Agency habang dinala sa pagamutan ang limang sundalo na sina Pfc. Mohammad Ali, Pfc. Danny Mark Tandog, Pfc. Alfred Ablasar at Private Paul Salidong.
Sa ulat, dakong alas-12:08 ng madaling araw nang ay nagsasagawa ng security patrol ang tropa ng Army’s 27th Infantry Batallion nang atakehin ng mga rebelde sa pangunguna ng isang alyas Ka Bordjack ang Lapanday Foods Corporation sa Brgy. Kipalbig, Tampakan na tinangkang sunugin ang airstrip at airplane na ginagamit na pang–spray sa nasabing banana plantation.
Nagresponde ang militar na tinulungan sa bakbakan ang mga security guards dito na ang palitan ng putok ay tumagal ng 30 minuto bago nagsiatras ang mga rebelde patungo sa hindi pa malamang destinasyon.
Ang Lapanday Food Corporation ay matagal ng nakakatanggap ng banta mula sa NPA rebels na humihingi ng revolutionary tax sa nasabing tanggapan at kung hindi magbibigay ay isasabotahe ito na siyang nangyari.