MANILA, Philippines - Hindi na umabot ng buhay sa ospital ang isang Indian national nang ito ay pagbabarilin ng isang angkas sa motorsiklo kahapon ng umaga sa Brgy. Milagrosa, Project 4, Quezon City.
Ang nasawi ay kinilalang si Sa Kulpal Singh, 52, may-asawa, negosyante ng no. 36 HB Gonzales St., Xavierville Subdivision, Loyola Heights.
Batay sa ulat, dakong alas-7:50 ng umaga ay may sinisingil na pautang ang biktima sa harap ng isang bahay sa JP Rizal St., kanto ng Raja Matanda St., Brgy.Milagrosa, Project 4 nang sumulpot ang isang motorsiklo na walang plaka sakay ang dalawang lalaki nang magbunot ng baril ang angkas at pinagbabaril ang biktima.
Ilang residente na nakarinig ng putok ng baril ang lumabas at nakita ang biktima na duguang nakasalampak sa kanyang motorsiklo. Patuloy ang imbestigasyon ng pulisya dahil ang pera at gamit ng biktima ay hindi kinuha sa kanyang katawan.