MANILA, Philippines - Pinatay sa saksak ng isang tatay ang isang 35-anyos na lalaki na sumapak sa kanyang 11-anyos anak na lalaki kamakalawa sa Brgy. Manat, Binmaley, Pangasinan.
Ang nasawi dahil sa mga tama ng saksak ng ‘Swiss knife sa iba’t ibang bahagi ng katawan ay kinilalang si Andrew Velasco.
Tumakas naman ang suspek na si Alfredo Sanchez, 42-anyos at kapitbahay ng suspek sa lugar.
Bago nangyari ang krimen bandang alas-9:30 ng gabi sa Brgy. Manat, Binmaley ng lalawigan ay umiiyak na nagsumbong ang 11-anyos na anak ng suspek na si Miko sa kaniyang ama na umano ay sinapak at binatukan ni Velasco.
Galit na galit na sinugod ng suspek ang biktima na nagtatakbo at nang maabutan sa paanan ng Manat Bridge ay doon na ito nagsuntukan hanggang sa nauwi sa pananaksak ng ‘Swiss knife’.
Duguang bumulagta ang biktima at tumakas ang suspek.