MANILA, Philippines - Nasawi ang apat katao habang apat din ang nasugatan matapos bumaliktad ang isang mixer truck sa kahabaan ng highway ng Brgy. Abong-Abong, Maluso, Basilan kahapon.
Ang mga nasawing biktima ay kinilalang sina Angelino Alejandro, nasa hustong gulang; Eddie Misamis, Brgy. kagawad; Marisa Jakaria, 14 ng Jolo, Sulu at Adding Duterte, nasa hustong gulang.
Ang mga nasugatan ay kinilalang sina Mohammad Adil Badidi, nasa hustong gulang, driver ng transit mixer; Michael Abubakar, obrero; Annori Tayabas, 40, CAFGU at isang alyas Awan, foreman ng Michael Abubakar Construction.
Sa ulat ni Sr. Supt. Mario Dapilloza, Provincial Police Office (PPO) Director ng Basilan Police, dakong alas-9:00 ng umaga ay kasalukuyang minamaneho ni Badidi ang transit mixer (RHD 867) nang biglang sumabog ang unahang gulong sa kanan bunsod upang ito ay bumaliktad ng ilang ulit.
Sanhi, upang maipit ang apat na biktima na binawian ng buhay sa insidente habang isinugod naman sa pagamutan ang 4 na nasugatan.