MANILA, Philippines – Tuluyan nang hindi nagising sa mahimbing na pagtulog ang isang barker matapos na ito ay pasukin sa kanyang kubol at barilin ng isang hindi pa kilalang lalaki kahapon ng madaling-araw sa Brgy.Commonwealth, Quezon City.
Ang nasawi ay kinilalang si Rinald Memis, 42, binata ng 731 Litex Road, Brgy. Commonwealth sa lungsod.
Batay sa ulat, ganap na ala-1:00 ng madaling araw nang pasukin ng hindi pa kilalang suspek ang kubol ng biktima sa nasabing lugar at barilin.
Sa salaysay ng isang Art Alestre, kalapit kuwarto ng biktima, natutulog siya nang mga oras na iyon nang biglang may tumadyak sa pintuan niya at pumasok ang suspek sabay tutok ng baril at tinanong ang kinaroroonan ng biktima.
Sa takot ay itinuro ang tinutuluyang kuwarto ng biktima na ilang hakbang lang ang layo hanggang nakarinig na lang ito ng putok ng baril.
Patuloy ang imbestogasyon kung ano ang motibo ng pagpatay sa biktima.