MANILA, Philippines – Nasa kritikal na kondisyon ang isang barangay chairman habang nasugatan ang dalawang katao matapos na sila ay pagbabarilin ng hindi pa kilalang suspek sa naganap na ambush kamakalawa sa Isabela City, Basilan.
Ang barangay chairma na kritikal ang lagay sa ospital ay kinilalang si Franklin Galos Tan, 33, chairman sa Brgy. Seaside ng lungsod.
Nasugatan ang dalawang sibilyan nang tamaan ng ligaw na bala na sina Myrna Sali, 39, vendor na tinamaan sa kanang kamay at Joseph Sumalpong, 20, nagtamo ng tama ng bala sa kaliwang hita.
Sa ulat, bandang alas-2:40 ng hapon ay kasalukuyang nakatayo si Tan sa harap ng isang tindahan sa Valderosa Street, Brgy. Port Area nang sumulpot ang dalawang lalaki na sakay ng isang motorsiklo at pinagbabaril ito.
Nagkataong nandoon din ang dalawang sibilyan kaya’t tinamaan ang mga ito ng ligaw na bala.