MANILA, Philippines - Pitong saksak ang tinamo ng isang 18-anyos na dalaga matapos itong pagsasaksakin ng nobyo na nairita sa pagtanggi nitong makipag-sex sa kanya kamakalawa sa Brgy. San Carlos, Anilao, Iloilo.
Namatay noon din ang biktimang si Julie Ann Valencia, residente ng Brgy. Vista Alegre, Barotac Viejo, Iloilo.
Isang manhunt operation ang isinasagawa ng otoridad laban sa suspek na si Marky Jagorin, 25-anyos ng Brgy. San Carlos, Anilao na tumakas matapos ang ginawang krimen.
Lumalabas sa imbestigasyon, dakong alas- 6:30 ng umaga kamakalawa nang madiskubre ang bangkay ng biktima sa silid ng bahay ng isang Luis Senanin sa Brgy. San Carlos, Anilao.
Huling nakitang buhay ang biktima noong Sabado ng gabi nang magpaalam ito sa kaniyang mga magulang na manonood ng Banaag Festival sa bayan ng Anilao, subalit nakipagtagpo ito sa kaniyang nobyo at dinala sa bahay ni Senanin.
Sa salaysay ni Senanin, bandang alas-2:00 ng madaling-araw ng marinig niyang nagkakalabugan sa katabing silid at nagtatalo ang magkasintahan hanggang sa saktan na umano ng suspek ang nasabing dalaga na umiiyak at humihingi ng tulong.
Ayon sa matanda, natakot umano siya kaya nagsara na lamang ng pinto hanggang sa makatulog at kinabukasan ng umaga ay humingi ng tulong sa kanilang punong barangay kung saan nadiskubre ang bangkay ng biktima.
Sa teorya ng pulisya, posible umanong pinilit ng suspek ang biktima na mag-sex nguni’t tumanggi kaya sinaktan hanggang sa mapatay matapos na marekober sa crime scene ang sex video sa cell-phone ng nasabing lalaki na pinanood pa ng magkasintahan bago naganap ang krimen.