MANILA, Philippines — Tangkang makahabol ng Talk ‘N Text sa Top-2 finish at asam na twice-to-beat habang iiwas sa eliminasyon ang Blackwater kontra sa kanilang magkaibang karibal sa umiinit na 2024 PBA Philippine Cup ngayon sa PhilSports Arena sa Pasig.
Kikilatisin ng Tropang Giga (5-4) ang sibak ng Converge (1-9) sa alas-7:30 ng gabi habang bigating misyon ang nakaabang sa Bossing (3-6) kontra sa wala pang galos na San Miguel Beer (9-0) sa alas-4:30 ng hapon.
Tabla ngayon sa ikatlong puwesto kasama ang NLEX at Magnolia na may pare-parehong 5-4 kartada, buhay pa ang pag-asa ng TNT na makadikit sa No. 2 na Barangay Ginebra (7-3) para sa huling twice-to-beat advantage.
Nasikwat na ng reigning champion Beermen ang siguradong No. 1 seed at ang isa pang win-once bonus sa inaaabangang quarterfinals.
Upang magawa ito ay sasandal ang Tropang Giga sa 108-101 panalo nito kontra sa Phoenix Super LPG noong nakaraang linggo para makahabol sa league-leaders. Ang karibal nilang Converge ay galing naman sa 105-93 kabiguan kontra sa Ginebra.
Sa kabilang banda, bagama’t kailangan ng Bossing na makaiskor ng krusyal na panalo ay hindi nila hawak ang kanilang kapalaran.
Nasa 3-6 ngayon bunsod ng anim na sunod na pagkatalo sa ika-10 puwesto, kailangan ding humiling ng Bossing na mabigo ang kanilang mga karibal na nasa unahan ng standings.
Sa ngayon ay tabla-tabla ang Meralco, Terrafirma at Rain or Shine sa No. 8 seed hawak ang pare-parehong 5-5 kartada.