Cool Smashers, Angels tatapusin na ang serye
MANILA, Philippines — Hangad ng Creamline at Petro Gazz na tuluyan nang tapusin ang series sa paglarga ng Game 2 ng 2023 Premier Volleyball League (PVL) All-Filipino Conference best-of-three semifinals series sa Mall of Asia Arena sa Pasay City.
Muling sasagupain ng Gazz Angels ang PLDT High Speed Hitters sa alas-4 ng hapon kasunod naman ang pakikipagtuos ng Cool Smashers sa F2 Logistics sa alas-6:30 ng gabi.
Nakauna ang Cool Smashers nang patumbahin nito ang Cargo Movers, 26-24, 25-18, 22-25, 25-15, sa Game 1 ng serye noong Sabado.
“We’re just focused on our team. Whether Myla (Pablo) plays or not, we’ll prepare for F2,” pahayag ni Creamline head coach Sherwin Meneses.
Ipaparada ng Cool Smashers ang matikas na troika nina Michele Gumabao, Tots Carlos at Jema Galanza kasama pa sina middle blockers Jeanette Panaga at Ced Domingo at playmaker Jia Morado.
Hindi nakapaglaro si Pablo sa Game 1 dahil sa iniindang injury.
Ayaw naman isugal ni F2 head coach Regine Diego ang paglalaro ni Pablo dahil prayoridad nito ang kalusugan ng outside hitter.
“Priority namin yung health ng mga players,” ani Diego.
Dahil dito, kailangang kumayod ng husto nina Kim Kianna Dy, Aby Maraño, Ivy Lacsina at Ara Galang gayundin nina setter Kim Fajardo at libero Dawn Macandili.
Sa kabilang banda, nanaig ang Gazz Angels sa High Speed Hitters, 22-25, 25-19, 25-21, 25-18, sa hiwalay na laban.
Umaasa si Petro Gazz head coach Oliver Almadro na tatapusin na ng kanyang tropa ang serye ngunit kailangang maging solido ang kanilang laro para maisakatuparan ito.
Isa sa aasahan ni Almadro si Jonah Sabete na nagpasabog ng 18 points at 11 receptions sa Game One.
- Latest
