MANILA, Philippines — Puntirya ng Choco Mucho na makapasok sa podium sa Premier Volleyball League (PVL) All-Filipino Conference na papalo sa Pebrero 4 sa Smart Araneta Coliseum.
Mula nang sumabak ang Flying Titans sa liga noong 2019, pinakamataas na pagtatapos nito ang dalawang beses na ikaapat na puwesto sa Open Conference noong 2021 at 2022.
Sa pagkakataong ito, hahawakan ang Flying Titans ni veteran mentor Dante Alinsunurin.
At sa bagong sistema ng tropa, tiwala si middle blocker Bea De Leon na makakapasok sa podium ang Choco Mucho.
“For this conference, we are definitely looking at the podium finish. With our new coach, we’re confident that we can do just that,” ani De Leon.
Sinabi ni De Leon na mabilis na nakakasabay ang kanilang koponan sa sistema ni Alinsunurin.
“Our spirits are high and our hopes are very high as well and we hope to continue to stay together,” dagdag ni De Leon.
Umaasa itong magiging maganda ang resulta ng kanilang pagsisikap sa ilalim ng paggabay ni Alinsunurin.
“I think we’re adjusting really well with the new system. He is a very quiet man but he teaches very well. Hopefully, little by little, in time for the season, we can fully grasp his system. We wish we had a bit more time but everyone’s on the same boat. I think little by little it’s coming together in training,” kuwento pa ni De Leon.
Solido pa rin ang Choco Mucho dahil tanging si outside hitter Ponggay Gaston lamang ang nawala sa lineup.
Nagpasya si Gaston na lumundag sa Chery Tiggo.
Nariyan pa rin sa Flying Titans si veteran opposite spiker Kat Tolentino, outside hitters Des Cheng at Isa Molde, middle blocker Maddie Madayag at playmaker Deanna Wong.