Kampante ang record ni Don Ramon
Base sa kasalukuyang average ni LeBron James na 30.2 points per game, tinatantiya na lalapagpasan na niya ang all-time scoring record na hawak ni Kareem Abdul-Jabbar (38,387) pagpasok ng ng Pebrero.
Pagkatapos kumana ng 46 points kontra LA Clippers noong Miyerkules (Manila time), 178 points ang natirang kailangang ikamada ni LeBron para tuluyang maangkin ang marka.
Walang nakikitang aawat pa sa pagtuntong ni LeBron sa kaitaasan ng scoring list, puwera na lang kung may mangyayaring hindi inaasahan na magpapatigil sa paglalaro ng LA Lakers superstar.
Sa PBA, kampanteng-kampante sa pamamahinga ang record ni Ramon Fernandez (18,996).
Mukhang maski ang mga sumusunod na marka na hawak nina Abet Guidaben (15,775), Alvin Patrimonio (15,091), Atoy Co (12,994) at Nelson Asaytono (12,268) eh mahirap basagin.
Sina James Yap at Arwind Santos ang mga nasa itaas sa scoring ladder sa mga aktibong PBA players.
Pero sa kanilang edad, mukhang malabong mapasok nila ang Top Five all-time scoring leaders, lalung-lalo na nga na maging threat sa record ni Don Ramon.
Mas lalong super layo ng record nina Fernandez, Guidaben at Co kung idadagdag ang mga puntos na kinamada nila ng kanilang paglalaro sa MICAA.
Lintek ang mga numero ng mga Crispa at Toyota stars dahil nga dominado nila ang mga unang panahon ng PBA.
Maaaring threat si June Mar Fajardo kung makakapagdomina rin siya sa kagayang haba ng paglalaro nina Fernandez (20 seasons) at Guidaben (21).
- Latest