Importante ang bawat laro sa PVL semis
MANILA, Philippines — Lumakas ang tsansa ng Creamline at Cignal para sa dalawang slots sa finals sa Premier Volleyball League (PVL) Reinforced Conference.
Inilabas ng Cool Smashers at HD Spikers ang kanilang buong lakas para mabilis na pataubin ang kani-kanilang karibal noong Huwebes.
Pinataob ng Cool Smashers ang defending champion na Petro Gazzm 25-21, 25-20, 25-23, habang nanaig ang HD Spikers sa Chery Tiggo, 28-26, 25-17, 25-23.
Kapwa may 1-0 rekord ang Cool Smashers at HD Spikers, samantalang bumagsak sa 0-1 marka ang Gazz Angels at Crossovers na kinakailangang maipanalo ang kanilang susunod na laro para manatiling buhay ang pag-asa.
Inaasahang ibubuhos na ng Creamline at Cignal ang kanilang buong lakas sa ikalawang araw ng semifinal round bukas sa Smart Araneta Coliseum.
Maghaharap ang Cool Smashers at HD Spikers sa alas-2:30 ng hapon at magtutuos ang Crossovers at Gazz Angels sa alas-5:30 ng hapon.
“Bawat game talaga importante kaya we’re happy na nakuha namin iyong panalo sa Petro Gazz in three sets kasi malaking tulong iyong sa point system if ever magkaroon ng tie,” wika ni Cool Smashers’ coach Sherwin Meneses.
Importante ang bawat laro sa semis dahil ang dalawang mangungunang koponan matapos ang round robin ang papasok sa best-of-three championship series.
Mauuwi naman sa battle-for-bronze ang No. 3 at No. 4 teams.
“One game at a time. Our focus right now is Cignal,” ani Meneses.
- Latest