UP nakatutok sa win No. 3 vs FEU
MANILA, Philippines — Ang ikatlong panalo ang susubukang masikwat ng University of the Philippines sa pagharap sa Far Eastern University sa UAAP Season 85 men’s basketball tournament sa Smart Araneta Coliseum.
Magkukrus ang landas ng Fighting Maroons at Tamaraws ngayong alas-4 ng hapon, habang masisilayan ang engkuwentro ng UE Red Warriors at Adamson Soaring Falcons sa alas-2.
May 2-0 record ang UP kasosyo ang Ateneo Blue Eagles.
Sa kanilag huling laro ay naitakas ng Fighting Maroons ang 87-78 overtime win kontra sa Soaring Falcons.
Wala si JD Cagulangan sa lineup na nagpapagaling pa sa injury.
Subalit malalim ang bench ng UP kaya’t nagagawa pa rin nilang makahataw sa likod ni Terrence Fortea.
“Terrence really picking up naman since before na mag-start. Last season was a big adjustment for him kasi for that position,” sabi ni Fighting Maroons coach Goldwin Monteverde.
Hahataw rin para sa UP si Gilas Pilipinas standout Carl Tamayo kasama sina Zavier Lucero at Malick Diouf.
Sa kabilang banda ay hangad naman ng Tamaraws na makasampa sa win column.
Lumasap ang FEU ng dalawang sunod na kabiguan kasama ang masaklap na 66-76 pagyuko sa UE noong Miyerkules.
Kaya naman inaasahang ilalabas ng Tamaraws ang lahat ng sungay upang masikwat ang kanilang unang panalo.
Kakayod para sa FEU sina Patrick Sleat, Cholo Añonuevo at LJ Gonzales.
- Latest
