Marinero, La Salle puro na sa Finals

MANILA, Philippines — Pinatumba ng Marinerong Pilipino ang Apex Fuel-San Sebastian, 74-66, sa Game One ng kanilang semifinals series at makalapit sa championship spot sa 2022 PBA D-League Aspirants’ Cup kahapon sa Smart Araneta Coliseum.

Nagposte si Juan Gomez de Liaño ng 16 points, 10 rebounds at 7 assists para ihatid ang Skippers sa 1-0 lead sa kanilang best-of-three duel ng Golden Stags.

“We’re happy sa mga players kasi na-execute namin ng maayos iyong gameplan namin,” ani coach Yong Garcia. “Pero Game One pa lang ito and hopefully sa Game Two, maka-execute ulit kami.”

Pinamunuan ni Gomez de Liaño ang 21-8 atake ng Marinero na nagbigay sa kanila ng 17-point lead, 72-55, sa fourth quarter.

Binanderahan ni Ichie Altamirano ang Apex-SSC sa kanyang 12 points.

Sa ikalawang laro, tinalo ng EcoOil-La Salle ang Adalem Construction-St. Clare, 89-74, para sa tsansa sa pagsikwat sa Finals berth.

Humataw si Schonny Winston ng 24 points, 4 assists, 3 rebounds at 3 steals para pamunuan ang Green Archers.