Sotto maglalaro sa Gilas sa 4th window

Sa 2023 World Cup

MANILA, Philippines — Bukod kay NBA ace Jordan Clarkson ay ipaparada rin ng Gilas Pilipinas si Pinoy giant Kai Sotto para sa fourth window ng 2023 FIBA World Cup Asian Qualifiers ngayong buwan.

Ipinahayag kahapon ng Samahang Basketbol ng Pilipinas (SBP) ang commitment at availability ng 7-foot-3 center kontra sa Lebanon sa Agosto 25 sa Beirut at laban sa Saudi Arabia sa Agosto 29 sa Mall of Asia Arena.

“We are glad to have Kai into the Gilas fold and thank him for his proactive response to the call to play for flag and country for the August Qualifiers,” ani SBP spokesperson at executive director Sonny Barrios.

Darating ang 20-anyos na si Sotto sa Agosto 18 kasabay ng arrival ng Utah Jazz guard at 2021 NBA Sixth Man of the Year na si Clarkson.

Noong Hunyo ay nabigo si Sotto na mapili sa 2022 NBA Rookie Draft subalit doon pa lamang ay inihayag na niya ang kagustuhang makapagsilbi ulit sa bayan.

Ang Gilas tour of duty muna ang magiging misyon ni Sotto bago maglaro sa Adelaide 36ers sa Australia National Basketball League (NBL) para sa kanyang ikalawang season.

Matapos maging undrafted sa NBA ay pumirma si Sotto ng kontrata upang magbalik sa NBL kung saan siya naging unang Filipino player bago sumubok sa NBA.

Magbabalik si Sotto sa Gilas matapos sumalang sa kanyang national men’s team debut sa FIBA Asia Cup Qualifiers sa Clark at FIBA Olympic Qualifying Tournament sa Belgrade, Serbia.

Sa kanyang national team return ay makakasama ni Sotto sina Dwight Ramos, Carl Tamayo, Kevin Quimbao, Bobby Ray Parks Jr., Kiefer at Thirdy Ravena bilang bahagi ng inisyal na Gilas pool.

Tutulong sa kanila ang mga PBA reinforcements mula sa 10 teams na hindi aabot sa 2022 Philippine Cup semifinals.