San Miguel pinutol ang linya ng Converge
MANILA, Philippines — Bumangon ang San Miguel sa una nilang kabiguan matapos ibaling ang galit sa Converge, 111-92, sa PBA Philippine Cup kahapon sa Ynares Center sa Antipolo City.
Humakot si CJ Perez ng triple-double na 15 points, 13 rebounds at 12 assists para sa 4-1 record ng Beermen at sosyohan ang Ginebra Gin Kings sa liderato.
“Siyempre, willing akong mag-step up para sa mga teammates ko. Nagtitiwala lang talaga kami sa isa’t isa para manalo kami,” ani Perez.
Tumipa si Jericho Cruz ng 22 points, ang 18 rito ay iniskor niya sa first half.
Bigo ang FiberXers na maitala ang ikalawang sunod na panalo para sa 2-4 marka.
Matapos tangayin ang 28-16 bentahe sa first quarter ay umarangkada ang San Miguel sa second period para itayo ang 31-point lead, 57-26, sa Converge sa 4:02 minuto patungo sa halftime.
Nagpilit ang FiberXers na makalapit, ngunit hindi bumitaw ang Beermen sa paghawak sa kalamangan at inilista pa ang 98-74 abante sa huling 4:55 minuto ng final canto.
Sa unang laro, pinamunuan ni Season 46 Rookie of the Year Mikey Williams ang ratsada ng nagdedepensang TNT Tropang Giga sa fourth period para kunin ang 87-72 panalo sa Phoenix
Tumapos si Williams na may 27 points tampok ang 11 sa final canto para sa ikatlong dikit na panalo ng Tropang Giga (5-2) at may 20 markers si RR Pogoy.
Nahulog ang Fuel Masters (2-4) sa kanilang ikalawang sunod na kabiguan.
- Latest