Casimero nag-eensayo na

MANILA, Philippines — Sumalang na agad sa ensayo si World Boxing Organization (WBO) bantamweight champion John Riel Casimero kahit wala pang naikakasang laban para sa kanya.

Inihayag ni Casimero na kailangan na nitong bumalik sa pukpukang pagsasanay upang mapanatili ang matikas niyang kundisyon.

Wala na munang party-party.

“Simula na ulit tayo sa training. Tapos na ‘yung party-party natin,” ani Casimero na nagpatikim sa kanyang inilabas na video.

Ipinagmalaki nitong mararamdaman nang husto ni World Boxing Council (WBC) bantamweight king Nonito “The Filipino Flash” ang puwersa niya kung maikakasa ang kanilang laban.

“Pag ito tumama kay Nonito Donaire Jr., pag-gising mo puyat ka pa,” ani Casimero na tuloy pa rin ang pakikipagpatutsadahan kay Donaire sa social media.

Inakusahan ni Donaire si Casimero na ayaw pu-mirma sa kontrata dahil natatakot ito sa VADA testing.

Rumesbak si Casimero na sinabing walang kontratang dumarating sa kanyang kampo.

“Wala pa naman akong natatanggap. Ano ba ang sinasabi niya?” ani Casimero.

Handa si Casimero na makipag-usap kay Donaire upang maikasa ang laban.

“Subukan naming tawagan si Donaire para mag-kausap kami. Bigyan namin siya ng link para makapasok. Kaming dalawa lang, walang ibang papasok,” ani Casimero.

Iginiit ni Casimero na wala itong aatrasang laban.