MANILA, Philippines — Hindi naiwasan ni Pinoy billiards champion Carlo Biado ang maging emosyunal nang pagha-rian ang katatapos lamang na US 9-Ball Open Championship noong Linggo sa Atlantic City, USA.
“Siguro dahil sa sobrang saya kaya ako napaluha at dahil sa pinagdadaanan natin ngayong pandemya hindi ko ine-expect na ganito ang kalalabasan ng pagkapanalo ko,” sabi ng 37-anyos na tubong Nueva Ecija na si Biado kahapon sa online edition ng Philippine Sportswriters Association (PSA) Forum.
Isang come-from-behind 13-8 win ang kinuha ni Biado laban kay Aloysius Yapp ng Singapore sa final round para tapusin ang 27-taong pagkauhaw ng Pinas sa US 9-Ball crown.
Ang idol ni Biado, naging caddie sa Villamor Air Base golf course, na si billiards legend Efren Reyes ang huling Pinoy na nagkampeon sa nasabing torneo noong 1994.
“Itong US Open na ito ay pangarap ko talagang makuha ito, matagal ko nang inaasam ito,” ani Biado.