MVP win ni Jokic sinapawan ng Phoenix

DENVER — Diniskaril ng Phoenix Suns ang pagdiriwang ni Nikola Jokic ng pagkopo niya ng MVP trpohy matapos angkinin ang 116-102 panalo sa Denver sa Game Three para umabante sa 3-0 sa kanilang Western Conference semifinals series.

Kumamada si Devin Booker ng 28 points at nakipagtambal kay Chris Paul para sa  makalapit ang Suns sa kauna-una-hang conference finals matapos noong 2009-10 season.

Tumapos si Paul na may 27 points, 8 assists at 3 steals para sa Phoenix na nakalayo sa Denver matapos ang halftime para dumiretso sa kanilang ikaanim na sunod na ratsada kasama ang pagsibak sa Los Angeles Lakers sa first round.

Kumolekta si Jokic ng triple-double sa kanyang 32 points, 20 rebounds at 10 assists para pamunuan ang Nuggets habang may 21 markers si Monte Morris mula sa bench.

Pormal na ibinigay ng NBA ang MVP trophy kay Jokic bago simulan ang Game Three.

Sa Philadelphia, humakot si Joel Embiid ng 27 points, 9 rebounds, 8 assists at 3 blocked shots sa 127-111 pagsagasa ng 76ers sa Atlanta Hawks sa Game Three para kunin ang 2-1 lead sa kanilang Eastern Conference semifinal duel.

Naglalaro si Embiid na may cartilage tear sa kanyang kanang tuhod.

Umiskor si Tobias Harris ng 22 points at may 18 markers si Ben Simmons para sa ikalawang sunod na panalo ng Philadelphia sa serye at pinigilan ang 13-game home winning streak ng Atlanta.

Binanderahan ni Trae Young ang Hawks sa kanyang 28 points at may 23 at 18 markers sina John Collins at Bogdan Bogdanovic, ayon sa pagkakasunod.