Giannis nagbida sa team Lebron

ATLANTA — Nagsanib-puwersa sina Milwaukee Bucks star forward Giannis Antetokounmpo, Portland Trail Blazers scorer Damian Lillard at Golden State Warriors guard Stephen Curry para pangunahan ang Team LeBron sa 170-150 pagdurog sa Team Durant sa 2021 NBA All-Star Game kahapon dito sa halos bakanteng State Farm.

Tumapos si Antetokounmpo na may game-high 35 points tampok ang perpektong 16-of-16 fieldgoal shooting para hiranging NBA All-Star Game Most Valuable Player ng ika-70 edisyon ng NBA All-Star Game.

“You know, usually it is closed (on Sundays),” sabi ni Antetokounmpo sa kanyang mga isinalpak na banked-in jumpers, “But for me, it was open extended hours.”

Nagdagdag si Lillard ng 32 points habang may 28 markers si Curry kasama ang walong three-point shots para sa Team LeBron.

Tumapos naman si LeBron James ng Los Angeles Lakers na may 4 points lamang mula sa 4-of-7 fieldgoal shooting.

Binanderahan ni Bradley Beal ng Washington Wizards ang Team Durant sa kanyang 26 points.

Hindi nakita sa aksyon si Kevin Durant ng Brooklyn Nets dahil sa kanyang hamstring injury.

Nag-donate ang Team LeBron ng higit sa $1 milyon sa Thurgood Marshall College Fund habang nagbigay ang Team Durant ng $500,000 sa United Negro College Fund.

Ginawa ng NBA ang All-Stars sa gitna ng kinakaharap na coronavirus disease (COVID-19) pandemic.

Bagama’t nagpapatupad ng mahigpit na health and safety protocols ay hindi pa rin nakalusot sina Philadelphia 76ers stars Joel Embiid at Ben Simmons na hindi pinaglaro dahil nagpositibo sa COVID-19 ang kanilang barberong pinagpagupitan.

Gagawin naman ang 71st All-Star Game sa 2022 sa Rocket Mortgage FieldHouse sa Cleveland kasunod sa Salt Lake City (2023) at Indianapolis (2024).