MPBL tuluy na tuloy na
MANILA, Philippines — Magbabalik na rin ang Maharlika Pilipinas Basketball League sa susunod na linggo matapos ang isang taong pakakatengga bunsod ng pandemya.
Nakakuha na ang amateur league ng go-signal mula sa Inter-Agency Task Force upang ituloy ang MPBL-Chooks-to-Go Lakan Season na nahinto sa Divisional Finals noong nakaraang taon.
Gaganapin ito sa ilalim ng gold standard bubble setting para sa sports resumption sa gitna ng pandemya sa Marso 10 sa closed-door Subic Bay Gym sa Zambales.
Maglalaban sa North championship ang San Juan Knights at Makati Supercruch habang pag-aagawan ng Davao Occidental Tigers at Basilan Steel ang South title upang makaabante sa best-of-five national finals.
Tabla sa 1-1 kartada ang best-of-three series ng dalawang divisions buhat nang matigil ang mga laro noong Marso dahil nag-shutdown ang sports dahil sa implimentasyon ng Enhanced Community Quarantine.
Nasa Subic na ang San Juan at Davao habang susunod ang Makati at Basilan bukas para sa torneong aabot sa Marso 20 kung sasagad sa dulo ang race-to-three championship. Sinundan ng MPBL ang Philippine Superliga bilang non-pro leagues na bumalik na rin noong nakaraang buwan sa pagdaraos ng beach voleyball sa parehong Subic bubble bilang unang semi-pro league na nakapag-resume sa gitna ng pandemya.
- Latest