Patibayan ang labanan sa Clark bubble
MANILA, Philippines — Hindi lamang katawan ng mga players ang dapat patibayin sa loob ng PBA ‘bubble’ sa Clark Freeport Zone sa Pampanga.
Ayon kay San Miguel veteran small forward Arwind Santos, masusukat din ang ‘mental toughness’ ng mga players ng 12 koponan sa restart ng 2020 PBA Philippine Cup na magsisimula sa Oktubre 11.
“Patibayan ng pag-iisip, ng personality. Kung hindi siya naiinip, advantage iyon,” sabi ni Santos sa programang “Sports Page”. “Kailangan nag-e-enjoy pa rin, nagagawa pa ring masaya para maganda ang maipakita sa laro sa loob.”
Sa pagdating ng mga koponan sa Clark ay dumiretso sila sa Quest Hotel sa Mimosa at ang ensayo at laro ay sa Angeles University Foundation (AUF) Gym. Sisimulan ng mga PBA teams ang kani-kanilang scrimmages bukas.
Target ang kanilang ikaanim na sunod na Philippine Cup title, susubukan ng mga Beermen na magawa ito nang wala si five-time PBA Most Valuable Player June Mar Fajardo na nagrerekober sa kanyang shin injury.
Bitbit ng San Miguel ang 1-0 record matapos kunin ang 94-78 panalo laban sa Magnolia sa pagbubukas ng torneo noong Marso 8 bago pinatigil ang liga dahil sa coronavirus pandemic.
Hindi rin kasama si Marc Pingris ng Magnolia dahil sa calf injury.
- Latest