Portland umangat sa 61 pts. ni Lillard
MANILA, Philippines — Siniguro ni Damian Lillard na hindi matatalo ang Portland sa pagposte ng career-tying 61 points upang pangunahan ang Portland Trail Blazers sa 134-131 panalo kontra sa Dallas Mavericks sa Walt Disney World na nagpa-lakas ng kanilang tsansa sa play-in series para sa huling playoff spot sa Western Conference.
Ito ang pang-11 na 50-plus point game ni Lillard sa kanyang buong career, pang-anim ngayong season. Umiskor din siya ng 51 puntos sa 124-121 panalo ng Blazers kontra sa Philadelphia noong Linggo para maging unang Portland player na mag-back-to-back 50-points game. Ikatlong beses ngayong season na tumapos ng 60-points o higit pa si Lillard na tanging si Wilt Chamberlain lang ang isa pa nakagawa nito sa buong NBA history.
Si Lillard ay 9-of-17 mula sa 3-point line kabilang ang tres na malayo sa arc na nangyari sa fourth quarter nang masuwerteng napunta sa kanya ang tumalbog na bola mula sa rim. Perfect siya sa free-throw line,18-of-18.
Pumasok ang Trail Blazers sa NBA bubble na malayo sa No. 8 seed at ngayon ay sila na ang omuokupa sa krusyal na puwesto at masisiguro nila ang slot sa play-in series kung mananalo sila sa kanilang huling laro kontra sa Brooklyn nitong Huwebes.
Malaki pa rin ang tsansa ng Memphis, pumasok sa bubble bilang No. 8 team na matagal nilang hinawakan bago maagaw ng Portland, nagposte ng kanilang ikalimang panalo sa 7-laro sa bubble, gayundin ang wala pang talo sa bubble na Phoenix Suns (6-0). May pag-asa pa rin ang San Antonio Spurs depende sa kanilang win percentage na basehan ng placings pagkatapos ng seeding games dahil hindi sila magkakapareho ng total games.
- Latest