Chooks-to-Go 3x3 papasok sa ‘bubble’
MANILA, Philippines — Inaasahang ang Chooks-to-Go Pilipinas 3x3 ang gagamit ng kauna-una-hang mobile app sa hanay ng mga professional leagues sa Pilipinas.
Ang nasabing computer program o software application ang gagamitin ng nasabing liga sa kanilang mga players sa pagpasok sa isang ‘bubble’ environment sa INSPIRE (Integrated Sports Performance, Innovation and Recovery) Sports Academy sa Calamba, Laguna.
“Mayroon silang app na gagamitin na kahit nasaan ‘yung player mata-track,” wika ni Games and Amusements Board (GAB) chairman Abraham ‘Baham’ Mitra. “Kapag may lumabas na player malalaman nila. Parang locator.”
Inaprubahan kamakailan ng GAB ang pagiging professional league ng Chooks-to-Go Pilipinas 3x3 para makahanay ang Philippine Basketball Association (PBA) at Philippine Football League (PFL).
Sa kanilang pagpasok sa ‘bubble’ ay susundin ng 3x3 league ang health at safety protocols na ipinatutupad ng Inter-Agency Task Force on Emerging Infectitious Diseases (IATF-EID).
“The player itself, ibi-video niya ‘yung sarili niya. Kukunan niya ang sarili niya ng temperature eight ‘o clock in the morning and eight o’ clock at night. In case mag-contact tracing later on malaking tulong iyon (app),” ani Mitra.
Ang INSPIRE Sports Academy, pagmamay-ari ng National University, ang gagamiting venue ng Chooks-to-Go Pilipinas 3x3 na pamamahalaan ni Commissioner Eric Altamirano.
“We’re very happy and si coach Eric of Chooks-to-Go has been very, very cooperative also. Looks like they’re all going to move to Laguna,” wika ni Mitra. “They’re going to practice there and eventually play there.”
Target ng liga na buksan ang kanilang season sa Setyembre.
- Latest
