Senior coaches papayagan ng PBA

MANILA, Philippines — Puwedeng makasama ang mga may edad na PBA coaches sa pagbabalik training ng mga koponan basta’t makapagpresenta ng medical certificate at makapasa sa COVID-19 swab test.

Ito ang siniguro nina PBA Commissioner Willie Marcial at GAB Chairman Baham Mitra kahit pa hindi ito inirerekomenda  sa Joint Administrative Order (JAO) ng GAB, PSC at DOH.

Sa ilalim ng protocols at guidelines ng JAO sa training restart ay dini-discouraged na lumahok ang sinomang atleta, coach o staff na edad 60-anyos pataas at 21-anyos pababa sa ensayo bunsod ng banta ng pandemya ngunit pinayagan ito ni Marcial basta’t makapasa sa mga nabanggit na requirements.

Inayunan naman ito ni Mitra lalo’t maituturing na essential part ng pro teams ang mga coaches kahit matatanda na ang mga ito.

Ang mga PBA coaches na lagpas 60-anyos na ay sina Norman Black ng Meralco (62), Tim Cone ng Ginebra (62), Leo Austria ng San Miguel (62) at Yeng Guiao (61) ng NLEX.

Sa oras na magnega-tibo ang mga PBA teams, staff, coaches at officials sa COVID-19 swab testing sa Agosto 6-7 ay lalarga na ang limitadong ensayo na bubuuin lang muna ng hanggang apat na manlalaro kada-batch.

Sa Makati Medical Center sasailalim ng swab test ang siyam na PBA teams na NLEX, TNT, Meralco, Alaska, Rain or Shine, Northport, Phoenix, Blackwater at Terra Firma (dating Columbian).

Sa sariling laboratoryo naman sa SMC headquarters magpapa-swab test ang koponan sa ilalim ng SMC umbrella na Ginebra, San Miguel at Magnolia.