Okay na sa NBA Board, okay din ba sa Players?

Portland lang ang ‘di sang-ayon

NEW YORK — Tuluyan nang inaprubahan ng NBA Board of Governors ang isang 22-team format para muling simulan ang 2019-20 season sa Hulyo 31 sa Orlando, Florida.

Ayon sa sources ng ESPN, ang resulta ng botohan ay 29-1 kung saan tanging ang Portland Trail Blazers ang hindi sumang-ayon sa proposal.

Nakikipagtulungan ang National Basketball Players Association sa mga league officials tungkol sa nasabing plano.

Isang conference call ang itinakda ngayon ng mga NBPA team player representatives para aprubahan ang proposal.

“The Board’s approval of the restart format is a necessary step toward resuming the NBA season,” ani NBA commissioner Adam Silver sa isang statement. “While the COVID-19 pandemic presents formidable challenges, we are hopeful of finishing the season in a safe and responsible manner based on strict protocols now being finalized with public health officials and medical experts.”

Sinuspindi ang NBA season noong Marso 11 matapos magpositibo sa COVID-19 si Utah Jazz center Rudy Gobert.

Sa naturang plano ay 13 Western Conference teams at siyam na Eastern Conference teams ang sasabak sa walong regular-season “seeding” games at sa isang play-in tournament para sa eighth seed at playoffs sa Walt Disney World Resort sa Orlando.

Ang top 16 teams sa Eastern and Western conferences ay sasamahan ng mga tropang may anim na laro na lamang para sa eighth place ng dalawang conferences.

Ang mga ito ay ang New Orleans Pelicans, Portland Trail Blazers, San Antonio Spurs,  Sacramento Kings, Phoenix Suns at Washington Wizards.

Magsisimula ang training ng mga koponan sa Orlando sa Hulyo 9-11.