LOS ANGELES — Nauna nang iginiit ni LeBron James na hindi niya iniisip ang manalo ng NBA MVP award.
Alam ng karamihan na matindi niyang kaagaw si Giannis Antetokounmpo ng Milwaukee Bucks.
Ngunit sa pagdayo ng Bucks sa Staples Center ay sinapawan ni James ang reigning MVP.
Kumolekta si James ng 37 points, 8 rebounds at 7 assists para pamunuan ang Los Angeles sa 113-103 pagdaig sa Milwaukee sa banggaan ng NBA conference leaders.
“We know who we are, and this is great competition,” wika ni James. “To have the opportunity to compete at a high level, that’s fun and exciting. But we know what we’re capable of.”
Ito ang ika-10 panalo ng Lakers sa huli nilang 11 games.
Dahil dito ay nakamit ng Lakers ang una nilang playoff spot sapul noong 2013.
Tumapos naman si Antetokounmpo na may 32 points at 12 rebounds para sa Bucks.
Sa Dallas, nagposte si Kristaps Porzingis ng 26 points at 11 rebounds at may 21 markers si Luka Doncic para akayin ang Mavericks sa 121-96 panalo kontra sa Memphis Grizzlies.
Ito ang pang-limang sunod na laro na nagtala si Porzingis ng higit sa 20 points at 10 rebounds.
Sa Boston, tumipa si Mike Conley ng anim na triples at tumapos na may 25 points, habang nagdagdag si Fil-Am Jordan Clarkson ng 17 markers para sa 99-94 paggupo ng Utah Jazz sa Celtics.
Sa Phoenix, humataw si Aron Baynes ng career-high 37 points tampok ang career-high na siyam na 3-pointers at may 24 markers si Dario Saric para sa 127-117 pagdaig ng Suns sa Portland Trail Blazers.
Nagdagdag si guard Devin Booker ng 23 points para sa Phoenix.
Sa New York, tinalo ng Oklahoma City Thunder ang New York Knicks, 126-103.
Nagtala si Danilo Gallinari ng 22 points para sa Thunder.
Sa Chicago, pinatumba ng Indiana Pacers ang Bulls, 108-102.
Kumabig si forward Domantas Sabonis ng 24 points at 12 rebounds.