MANILA, Philippines — Pakay ng Petron Blaze Spikers at F2 Logistics Cargo Movers na maibulsa ang ikalawang sunod na panalo sa pagharap sa kanila-kanilang katunggali sa 2020 Philippine Superliga Grand Prix sa The Arena sa San Juan City.
Babanggain ng nagdedepensang Petron ang Chery Tiggo Crossovers ngayong alas-5 ng hapon at susundan ng tapatan ng Cargo Movers at Cignal HD Spikers sa alas-7 ng gabi.
Bubuksan ng Marinerang Pilipina at Sta. Lucia ang hostilidad sa laban nila sa alas-3 ng hapon.
Kapwa ipinamalas ng dalawang top team sa liga ang kanilang angas at galing nang magawang patahimikin ang una nilang kalaban.
Dumaan man sa malaking pagbabago ang kanilang hanay ay pinatunayan pa rin ng Petron na isa sila sa dapat bantayan sa liga nang pahiyain ang mga kritiko matapos dagitin ang unang panalo sa bisa ng three-straight sets win kontra sa Generika-Ayala, 25-22, 25-22, 25-21
Muling sasandal ang Petron kay American skipper Khat Bell katuwang ang mga local wing spikers na si Ces Molina at Aiza Maizo-Pontillas kasama sina Rem Palma, Becca Rivera, Lut Malaluan at Angelica Nunag.
Sa panig naman ng F2 Logistics, magara rin ang naging panimulang banat ng tropa matapos lunurin ang PLDT Home Fibr Hitters ni multi-titled mentor Roger Gorayeb, 25-21, 25-13, 25-15.
Kumapit ang last season runner-up sa kanilang dynamic duo na sina Lindsay Stalzer at Kalei Mau, na bumomba ng double-digit finish para banderahan ang tropa sa unang tagumpay.
Aasahan muli ng Cargo Movers ang dalawang hitters kasama ang local core na sina Aby Maraño, Majoy Baron, Kim Dy, Ara Galang, Kim Fajardo at Dawn Macandili.