SAN FRANCISCO — Sa kanyang paglabas ng court ay tiniyak ni Golden State Warriors forward Draymond Green na maririnig pa rin siya ng officiating staff.
Sa gitna ng second quarter sa 116-86 panalo ng Los Angeles Lakers laban sa Warriors dito sa Chase Center ay natawagan si Green ng kanyang ikaapat na foul matapos siyang patumbahin ni Dwight Howard mula sa isang screen.
Sinigawan at minura ni Green sina referee Marat Kogut at Tyler Ford at natuluyan nang napatalsik sa laro.
“We needed him in the second half,” sabi ni Warriors head coach Steve Kerr of Green. “We missed him out there.”
Naharap lamang sa two-point deficit sa halftime, isinuko ng Golden State ang nine-point lead sa Los Angeles sa pagsisimula ng third period.
Isang 11-0 atake ang ginawa ng Lakers tampok ang transition dunk ni forward Kyle Kuzma para ibaon ang Warriors sa 21-point disadvantage.
Umiskor si Anthony Davis ng 23 points para sa pang-pitong sunod na panalo ng Lakers at NBA-record na ika-18 sa road games laban sa mga Western Conference teams.
Si Rajon Rondo ang sumalo sa trabaho ni LeBron James na may left groin injury at nagtala ng 12 points at 6 assists para sa Los Angeles.
Pinamunuan ni rookie Eric Paschall ang Golden State mula sa kanyang 23 points at may 16 markers si Jordan Poole.
Sa Indianapolis, naglista si Domantas Sabonis ng 20 points at 11 rebounds para igiya ang Indiana Pacers sa 106-100 panalo sa Portland Trail Blazers.
Binanderahan ni CJ McCollum ang Blazers sa kanyang 28 points at 8 assists, habang may 20 markers at 5 boards si Gary Trent Jr.
Sa Oklahoma City, humataw si Danilo Gallinari ng 24 points at bumangon ang Thunder mula sa 19-point deficit sa third quarter para resbakan ang Sacramento Kings. 112-108.
Nagdagdag si Shai Gilgeous-Alexander ng 20 points kasunod ang 17 markers ni Chris Paul para sa pang-limang dikit na ratsada ng Oklahoma City at ika-14 sa huli nilang 17 laro.
Sa Philadelphia, nagpasabog si Tobias Harris ng 34 points para pamunuan ang 76ers sa 115-106 pagpapabagsak sa New York Knicks bagama’t wala ang suspendidong si Joel Embiid.