Nuggets winasak ang Pistons; Lakers pinulutan ang Pelicans
DENVER – Tiniyak ng Nuggets na hindi na sila magugulat ng Detroit Pistons.
Humataw si forward Jerami Grant ng career-high na 29 points para tulungan ang Denver sa 115-98 paggupo sa Detroit.
Tatlong linggo na ang nakakalipas ay ginulat ng Pistons ang Nuggets sa overtime, 128-123.
Ngunit sa kanilang muling pagkikita ay mas naging agresibo ang Denver laban sa Detroit, nakahugot kina Derrick Rose at Christian Wood ng tig-20 points.
“Jerami gets you 29 (points) and five (rebounds). I just rode him that whole second half,” pagpuri ni Nuggets head coach Michael Malone kay Grant. “He was terrific.”
May 40-18 record ngayon, dinuplika ng Denver ang best start sa 58 games sa kanilang NBA franchise history.
Nagtala si center Nikola Jokic ng 16 points at 4 steals para sa Nuggets.
Sa Los Angeles, kumamada si LeBron James ng 40 points sa kanyang unang career meeting kay No. 1 overall pick Zion Williamson at inihatid ang Lakers sa 118-109 panalo sa New Orleans Pelicans.
Ito ang ikaanim na sunod na pananalasa ng Los Angeles.
Nagtala naman si Anthony Davis ng 21 points at 14 rebounds para sa kanyang 3-0 record laban sa dating koponan ngayong season.
Sa San Francisco, tumipa sina Harrison Barnes at De’Aaron Fox ng tig-21 points para akayin ang Sacramento Kings sa 112-94 paggupo sa Golden State Warriors.
Nalasap ng Warriors ang kanilang pinakamahabang home losing skid sa pito sa loob ng 19 taon.
Sa Portland, naglaglag si Jayson Tatum ng 36 points, tampok ito ang career-high na walong 3-pointers, para ihatid ang Boston Celtics sa 118-106 panalo laban sa Trail Blazers.
Sa Chicago, naglista si Dennis Schroder ng 21 points at gumawa ng magandang defensive play sa fourth quarter para pamunuan ang Oklahoma City Thunder sa 124-122 paglusot sa Bulls.
- Latest