Donaire-Inoue bout hinirang na ‘Fight of the Year’
MANILA, Philippines — Hinirang ang bantamweight showdown nina Nonito ‘The Filipino Flash’ Donaire, Jr. at Japanese star Naoya Inoue noong Nobyembre bilang ‘Fight of the Year’.
Ito ang inihayag ng Boxing Writers Association of America.
Tinalo ni Inoue si Donaire via unanimous decision sa kanilang matinding upakan noong Nobyembre 7 sa Saitama Super Arena sa Japan.
Hindi umatras si Donaire at nakipagsabayan kay Inoue simula umpisa hanggang sa huling segundo ng round 12.
Napabagsak ng Japanese fighter ang Filipino warrior sa 11th round.
Nakakuha si Inoue ng 117-109, 116-111 at 114-113 mula sa tatlong hurado at inangkin ang Muhammad Ali trophy sa kanyang panalo sa finals ng World Boxing Super Series tournament.
Napagbigkis din ni Inoue ang mga WBA, IBF at The Ring Magazine bantamweight titles.
Hindi naman nakapasa sa panlasa ng mga miyembro ng BWAA ang salpukan nina Manny Pacquiao at American slugger Keith Thurman.
Bukod sa Donaire-Inoue fight, naikunsidera rin ng BWAA para sa ‘Fight of the Year’ award ang mga upakan nina Gennadiy Golovkin at Sergiy Derevyanchenko, ang laban nina Andy Ruiz at Andy Joshua, ang bakbakan nina Errol Spence Jr. at Shawn Porter at ang suntukan nina Josh Taylor at Regis Prograis.
- Latest