MANILA, Philippines – Nasa 95 porsiyento na si world champion Jerwin Ancajas para sa kanyang International Boxing Federation (IBF) super flyweight title defense laban kay Mexican Jonathan Javier Rodriguez na sasambulat sa Nobyembre 2 (Nobyembre 3 sa Maynila) sa Dignity Health Sports Park sa Carson, California.
Ito ang inihayag ni chief trainer Joven Jimenez kung saan ipinagmalaki nitong handang-handa na si Ancajas sa laban.
Mabagsik at matatalim na suntok ang bitbit ni Ancajas sa Amerika na magiging armas nito upang patumbahin ang Mexican rival.
“We’re optimistic and we’re right on track in terms of preparations. He’s already at 95 percent ready. We’re also checking his weight to ensure that he’ll get the weight limit,” ani Jimenez.
Lumipad na kahapon patungong Amerika ang Team Ancajas upang doon ipagpatuloy ang kanyang training camp para sa laban.
Naglalaro sa 125 hanggang 126 pounds ang timbang ni Ancajas – may 11 pounds na lampas sa weight limit.
Ngunit hindi ito magiging problema dahil kasama ng Team Ancajas si nutritionist Jeaneth Aro na siya ring tumulong sa pagbabantay sa kondisyon ni Ancajas nang talunin nito si Japanese Ryuichi Funai via seventh-round knockout noong Mayo 4 sa Stockton, California.
Bago tumulak sa Amerika, sumailalim pa sa matinding ensayo si Ancajas sa Naval Education, Training and Doctrine Command sa San Antonio, Zambales para masiguro na nasa perpektong kondisyon ito.
Tatlong magkakaibang sparring partners ang hinarap ni Ancajas sa sparring session na tumagal ng anim na rounds.