Laban lang Gilas Pilipinas
MANILA, Philippines — Nagkaharap ang Gilas Pilipinas at Australian team na Adelaide 36ers kahapon, isang araw bago ang inaabangang tune-up game nila bukas sa Meralco Gym bilang bahagi ng pinal na paghahanda ng Nationals sa nalalapit na 2019 FIBA World Cup.
Nakadaupang palad ng koponan ang mga Aussies sa ginanap na sendoff press conference ng Gilas na inihanda nina Samahang Basketbol ng Pilipinas (SBP) chairman Emeritus Manny V. Pangilinan at president Al Panlilio.
Bukod sa dalawang high-ranking SBP officials ay nasa seremonya rin si PBA Commissioner Willie Marcial, Gilas Pilipinas head coach Yeng Guiao at ang kanyang mga manlalaro gayundin si dating PBA import at ngayon ay 36ers coach Joey Wright kasama ang kanyang mga players.
“We ancitipate good games against Adelaide 36ers. They play high quality basketball, world-class basketball. This will be a big help to our preparations,” ani Guiao.
Magaganap ang nasabing friendly games sa pagitan ng Gilas at NBL champion team na Adelaide bukas at sa Linggo na magiging batayan ni Guiao sa pagpili ng kanyang Final 12 line-up para sa World Cup na nakatakda sa Agosto 31 hanggang Setyembre 15 sa Foshan, China.
“We look forward to helping you guys prepare. That’s what we’re here for,” wika naman ni Wright na nagsilbing import dati ng Presto.
Kabilang sa pagpipilian ni Guiao ay ang kanyang training pool members na sina Andray Blatche, June Mar Fajardo, Troy Rosario, Japeth Aguilar, Gabe Norwood, RR Pogoy, Paul Lee, Mark Barroca, Christian Standhardinger, Beau Belga, Kiefer Ravena, Raymond Almazan, Robert Bolick at CJ Perez.
Umaasa naman ang koponan na gagaling sa takdang oras ang mga pilay na iba pang miyembro ng pool na sina Marcio Lassiter (MCL sprain), Matthew Wright (ankle) at JP Erram (ankle).
Ihahayag ni Guiao ang kanyang Final 12 matapos ang pares ng scrimmages kontra sa Adelaide bagama’t nagpahiwatig na may anim na manlalaro na ang sigurado sa puwesto.
Magsasanay pa ng ilang araw sa bansa ang Gilas bago lumipad sa Agosto 29 patungong China kung saan mapapalaban sila kontra sa Serbia, Italy at Angola sa bigating Group B.
- Latest