San Miguel lusot sa Katropa para tumabla
MANILA, Philippines — Kagaya ng inaasahan, bumangon ang Beermen mula sa naunang kabiguan para tumabla sa Tropang Texters.
Kinailangan ng San Miguel ang dalawang overtime period para lusutan ang TNT Katropa, 127-125, sa Game Two ng PBA Commissioner’s Cup Finals kagabi sa Smart Araneta Coliseum.
Rumesbak ang Beermen mula sa naunang 96-109 pagkatalo sa Game One para itabla sa 1-1 ang kanilang best-of-seven championship series ng Tropang Texters.
Sa likod ng 16 points, tampok dito ang 4-of-5-shooting sa three-point line, ni Terrence Romeo ay itinala ng San Miguel ang 56-39 abante sa TNT Katropa sa 4:18 minuto bago ang halftime.
Isinara ng Beermen ang first half bitbit ang 59-45 bentahe kung saan sila nagsalpak ng 11-of-17 clip sa 3-point range kumpara sa 1-of-11 ng Tropang Texters.
Ngunit hindi bumitaw ang Tropang Texters at inagaw ang 105-101 kalamangan sa huling 54.8 segundo ng final canto.
Isinalpak naman ni Terrence Romeo, tumipa ng 16 points sa first half, ang isang tres sa huling 18.7 segundo para itabla ang San Miguel sa 106-106 patungo sa overtime.
Sa extra period ay ipinasok ni Alex Cabagnot ang kanyang layup para muling itabla ang Beermen sa Tropang Texters sa 114-114 para sa ikalawang extension.
Tumipa ng dalawang free throws si five-time PBA MVP June Mar Fajardo at ang steal at fastbreak layup ni Chris Ross ang nagbigay sa San Miguel ng 126-122 bentahe sa 15.6 segundo.
Nagsalpak si Jayson Castro ng triple para idikit ang TNT Katropa sa 125-126 sa huling 11.7 segundo.
Nagkaroon pa siya ng tsansang maipanalo ang Tropang Texters kundi lamang parehong tumalbog ang dalawa niyang tangka sa 3-point line.
Nasibak si import Terrence Jones sa huling 21 segundo ng regulation.
- Latest