Creamline matindi ang training

MANILA, Philippines – Sumasailalim sa isang world-class training ang Creamline matapos kunin ang serbisyo ng isang Chinese coach para sa 2019 Premier Volleyball League (PVL) Reinforced Conference na magsisimula sa Linggo sa The Arena sa San Juan City.

Hawak na ngayon ng beteranong si Li Huanning ang Cool Smashers.

Pinalitan ni Li si dating Thai mentor Tai Bundit.

Ibang sistema ang dala ni Li kumpara sa mga pinapagawa ni Bundit.

Subalit bukas na bukas ang Cool Smashers sa mga pagbabago upang lubos na mapalakas ang kanilang koponan lalo pa’t ipagtatanggol ng tropa ang kanilang korona sa Reinforced Conference.

Aminado si team captain Alyssa Valdez na malaking adjustment ang pagpasok ng Chinese coach.

Ngunit itinuturing ito ni Valdez na malaking blessing dahil mas madadagdagan ang kanyang kaalaman sa volleyball.

“Masaya ako na nakikinig din siya sa amin. ‘Yung mga ideas namin and he’s willing to learn how to speak English and Tagalog,” ani Valdez.

Malalim ang karanasan ni Li na naging head coach ng Chinese team na isinabak sa 2009 FIVB Men’s Junior World Championship sa Pune, India.

Wala namang nakikitang problema ang Cool Smashers sa komunikasyon dahil mas mahalaga ang drills at talentong nadadala ni Li sa koponan.

Makakatuwang ni Valdez sa kampanya sina Thai Kuttika Kaewpin at Vene-zuelan Aleoscar Blanco gayundin sina Michele Gumabao, Risa Sato, playmaker Jia Morado at libero Melissa Gohing.

Mapapalaban ng husto ang Cool Smashers dahil magpaparada rin ng matitikas na imports ang ibang koponan.

Nangunguna na sa listahan si scoring machine Gyselle Silva ng Cuba na makakatuwang ni Edina Selimovic ng Bosnia and Herzegovina sa Motolite.

Papalo rin sina Kia Bright ng Amerika at Yasemin Sahin Yildirim ng Turkey para sa BanKo Perlas, Danijela Dzakovic ng Montenegro at Alexandra Vajdova ng Slovakia sa BaliPure, Wilma Salas ng Cuba at Janisa Ivette Johnson ng Amerika sa Petro Gazz at sina Thai spikers Sutadta Chuewulin at Kannika Tipachot sa Pacific Town Army.