Gabuco pasok sa finals

MANILA, Philippines — Tuloy ang mabagsik na laro ni dating world champion Josie Gabuco nang iselyo nito ang split decision win laban kay Mungunsaran Balsan ng Mongolia upang makahirit ng tiket sa finals ng women’s light flyweight category kahapon sa 2019 Asian Boxing Elite Championships na ginaganap sa Huamark Indoor Stadium sa Bangkok, Thailand.

Hindi nagsayang ng sandal si Gabuco nang pakawalan nito ang kumbinasyon dahilan upang bahagyang bumagal ang Mongolian fighter.

Isang solidong suntok ang naikonekta ni Gabuco para bilangan si Balsan ng referee may 56 segundo pang nalalabi sa second round ngunit nakatakas ang Mongolian pug.

Subalit hindi na ito nakalusot sa matutulis na atake ni Gabuco sa third round para tuluyang angkinin ng Pinay bet ang panalo.

Makakasagupa ni Gabuco sa championship round ang magwawagi sa pagitan nina Pin Meng-Chieh ng Chinese-Taipei at Kim Hyang Mi ng North Korea sa torneong inorganisa ng Asian Boxing Confederation.

Nagkasya naman si Ian Clark Bautista sa tansong medalya matapos matalo kay Mirazizbek Mirzahalilov ng Uzbekistan via split decision sa semifinals ng men’s bantamweight division.

Target ni reigning Southeast Asian Games champion John Marvin na makasungkit din ng silya sa finals sa pagsagupa nito kay Shinebayar Narmandakh ng Mongolia sa semifinals ng men’s light heavyweight division kagabi.