MANILA, Philippines — Pasig at Bataan ang kakatawan sa Pilipinas sa papalapit na Chooks-to-Go 3x3 Asia Pacific Super Quest katuwang ang International Basketball Federation (FIBA).
Ito ay matapos silang mag-top two sa katatapos lamang na Chooks-to-Go Pilipinas 3x3 President’s Cup kung saan nagkampeon ang Pasig Grindhouse Kings habang sumegunda naman ang Bataan Risers.
Sa Super Quest, masusukat ang dalawang koponan kontra sa mga best 3x3 clubs mula sa Mongolia (No. 2 in the world), China (No. 3), Japan (No. 4), Indonesia (No. 15), Australia (No. 25), New Zealand (No. 29), South Korea (No. 42), Chinese Taipei (No. 60), Vietnam (No. 65) at Hong Kong (No. 79) na ipinangako na ang kanilang partisipasyon.
Ito ay ang mga koponang Ulaanbataar ng Mongolia, Enerskin ng the Korea 3x3 Basketball League, Saigon Aces ng Vietnam, Absolute 3X3 Basketball ng Taipei, Jakarta West Bandits ng Indonesia, Tokyo Dime.exe ng Japan, TSV Reading Cinema ng Australia, Aotearoa ng New Zealand, Anytours M1 ng Hong Kong at SSLC ng China.
“After last year’s success of the FIBA 3×3 World Cup organized by SBP, the initiative of Chooks-to-go to set up a tournament with international teams from Asia-Pacific qualifying to the FIBA 3×3 World Tour is excellent news,” ani FIBA 3×3 Managing Director Alex Sanchez.
Tiket papunta sa FIBA 3x3 World Tour Masters na gaganapin sa Doha, Qatar sa Abril 18-19 ang nakataya sa naturang Super Quest na magaganap naman sa Abril 6-7 sa SM Megamall.