Westbrook nagposte ng 10-sunod na triple double
OKLAHOMA CITY — Naglista si Russell Westbrook ng NBA record nang magposte ika-10 sunod niyang triple-double, habang nagpasabog si Paul George ng 47 points para pangunahan ang Thunder sa 120-111 paggupo sa bisitang Portland Trail Blazers.
Binasag ni Westbrook ang kanyang pagkakatabla kay NBA great Wilt Chamberlain na nagtala ng siyam na sunod na triple-doubles noong 1968, nang tumapos na may 21 points, 14 rebounds at 11 assists.
Nakamit niya ang NBA record sa isang assist kay George para sa three-pointer ng Oklahoma City star forward sa huling 3:52 minuto ng fourth quarter.
Ito ang pang-23 triple-double ni Westbrook ngayong season at ika-127 sa kanyang career.
Nagdagdag naman si George ng 12 rebounds at 10 assists para sa ikatlong triple-double sa kanyang career habang tumipa si rookie Deonte Burton ng career-high 18 points at si Raymond Felton ay nag-ambag ng season-high 15 markers para sa Thunder.
Pinamunuan ni Damian Lillard ang Blazers sa kanyang 31 points kasunod ang 17 markers ni Jake Layman.
Sa Houston, kumamada si James Har-den ng 31 points para sa kanyang ika-30 sunod na pagpoposte ng 30-point game bagama’t may shoulder injury para tulungan ang Rockets sa 120-104 pananaig laban sa Dallas Mavericks.
Hawak ni Chamberlain ang pinakamahabang 30-point games streak sa NBA history.
Nagdagdag si Chris Paul ng 17 points at 11 assists, habang may 19 markers si Gerald Green tampok ang limang 3-pointers para sa ikaapat na panalo ng Houston sa huli nilang limang laban.
Binanderahan ni rookie Luka Doncic ang Mavericks sa kanyang 21 points, 10 rebounds at 8 assists.
Sa Chicago, humakot si Giannis Anteto-kounmpo ng 29 points at 17 rebounds, samantalang tumipa si Eric Bledsoe ng 19 points para ihatid ang Milwaukee Bucks sa 112-99 pagwawagi sa Bulls.
- Latest