Biado magarbo ang pagsisimula
MANILA, Philippines — Mainit na sinimulan ni Carlo Biado ang pagdedepensa sa titulo nang ilampaso si George Llanos ng Argentina, 9-3, sa Group 9 ng 2018 World 9-Ball Championship sa Al-Attiya Sports Arena sa Al-Arabi Sports Club sa Doha, Qatar.
Isang panalo na lamang ang kailangan ni Biado upang makahirit ng tiket sa knockout stage kung saan makakasagupa niya si Sergey Lutsker ng Russia na nagtala ng 9-8 desisyon kay Nguyen Anh Tuan ng Vietnam.
Nagtala rin ng pambuenamanong panalo sina Pinoy bets Jeffrey De Luna at Jeffrey Ignacio sa kani-kanilang grupo.
Naitala ni De Luna ang 9-7 panalo laban kay Sami Koylu ng Turkey sa Group 2, habang namayani naman si Ignacio kay Abdullah Alenzi ng Kuwait sa Group 6.
Kagaya ni Biado, kailangan lang nina De Luna at Ignacio na maipanalo ang kanilang susunod na laro para makapasok sa main draw.
Titipanin ni De Luna si Radoslaw Babica ng Poland na nanaig kay American Hunter Lombardo, 9-5, habang lalarga si Ignacio kontra kay Mateusz Sniegocki ng Poland na nagwagi kay Vincent Halliday, 9-7.
Nabigo sina Roland Garcia, Johann Gonzales Chua, Israel Rota at Marlon Manalo at Roberto Brillantes.
- Latest