Foton sumosyo sa liderato

MANILA, Philippines — Mabilis na dinispatsa ng Foton Tornadoes ang Smart Giga Hitters, 26-24, 25-15, 25-19, para su­mosyo sa liderato ng Philippine Superliga All-Filipino Conference sa The Arena sa San Juan City kahapon.

Naikonekta ng Tor­na­does ang ikaapat na su­nod na panalo para sa­luhan sa unahan ang Pet­ron Blaze Spikers.

Muling naasahan ng Foton si outside hitter Mi­na Aganon na nagtala ng 13 points mula sa siyam na attacks at apat na aces, habang nag-am­bag si team captain Maika Ortiz ng 10 attacks at isang block.

“Sobrang saya. Hindi namin ini-expect (‘yung 4-0). We just played our game. Positive lang ka­mi sa team namin nga­yon. Hindi namin ina­aalala ‘yung errors na­min,” ani Ortiz.

Nabangasan pa ang Tornadoes nang magtamo ng injury si star­ting opposite hitter Mae Layug sa kalagitnaan ng first set.

Ngunit hindi naman ito naging balakid matapos mag-step up ang iba pang miyembro ng tro­pa.

Sa unang laro, ginu­lantang naman ng Ge­nerika-Aya­­la ang F2 Lo­gistics, 19-25, 25-22, 25-16, 28-26, para su­mampa sa win column ma­tapos ang tatlong sunod na ka­biguan.

Nagsalansan si Patty Oren­dain ng 18 points, 24 digs at 10 receptions.