Creamline hangad ang semifinals berth
MANILA, Philippines — Target ng Creamline na kubrahin ang ikalawang silya sa semifinals sa paglarga laban sa Iriga-Navy sa pagpapatuloy ng Premier Volleyball League Season 2 Open Conference sa The Arena sa San Juan City.
Titipanin ng Cool Smashers ang Lady Oragons ngayong alas-7 ng gabi, habang magpapang-abot naman sa alas-4 ng hapon ang Pocari-Air Force at BanKo Perlas.
Umangat sa solong ikalawang puwesto ang Creamline tangan ang 8-2 marka matapos gapiin ang Pocari-Air Force, 23-25, 25-21, 25-20, 22-25, 15-9, noong Linggo sa larong ginanap sa Legazpi City.
Isang panalo na lamang ang kailangan ng Cool Smashers para samahan sa semis ang Ateneo De Manila University na nauna nang nagmartsa bunsod ng 10-3 kartada.
Kaya inaasahang ilalabas ng Creamline ang buong puwersa sa pangunguna nina Alyssa Valdez na isa sa nangungunang kandidato sa MVP race at ace setter Jia Morado.
Magpapasiklab din sina opposite hitter Michele Gumabao at wing spiker Jema Galanza at mamanduhan nina Risa Sato at Maria Paulina Soriano ang net defense ng tropa.
Sibak na ang Lady Oragons ngunit nais nilang magkaroon ng engrandeng exit para mapaganda ang kanilang 3-9 rekord.
Papalo para sa Iriga-Navy sina veterans Joanne Bunag at Nene Bautista kasama si team captain Grace Bombita.
Sa kabilang banda, nanganganib namang masibak ang Pocari-Air Force matapos mahulog sa 5-6 baraha kaya’t must-win ito laban sa BanKo Perlas.
Namayani ang Lady Warriors sa Perlas Spikers sa kanilang unang pagtatagpo sa first round ngunit ibang usapan na ang second round lalo pa’t nagnanais din ang BanKo na makalapit sa Final Four slot.
Sasandalan ng Lady Warriors si skipper Myla Pablo – ang league-leading scorer na may 18.5 points kada laro, habang susuporta sina Del Palomata, Jeanette Panaga, May Ann Pantino at Iari Yongco para maisalba ang kanilang tropa.
Kukuha naman ng lakas ang Perlas Spikers kina Dzi Gervacio at Nicole Tiamzon gayundin kina Kat Bersola, Joy Dacoron at playmaker Jem Ferrer.
- Latest
