Mills iniligtas ang San Antonio

LOS ANGELES - Kumonekta si guard Patty Mills ng isang go-ahead jumper sa huling 6.8 segundo para tulungan ang San Antonio Spurs sa 143-142 overtime win laban sa Lakers at kay LeBron James.

Isinalpak ni James ang panablang 3-pointer sa natitirang 2.4 segundo sa regulation at tumapos na may 32 points, 14 assists at 8 rebounds para sa wala pang panalong Los Angeles.

Subalit naimintis ng NBA superstar ang dalawa niyang free throws sa natitirang 12.8 seconds kasunod ang basket ni Mills para sa panalo ng Spurs.

Humakot si center LaMarcus Aldridge ng 37 points at 10 rebounds para sa San Antonio habang naglista si DeMar DeRozan ng 32 points at 14 assists.

Pinangunahan naman ni Kyle Kuzma ang Los Angeles, naglaro na wala sina starters Brandon Ingram and Rajon Rondo, sa kanyang 37 points at 8 rebounds.

Sa Oakland, humugot si Stephen Curry ng 15 sa kanyang 29 points sa third quarter para pamunuan ang nagdedepensang Golden State Warriors sa 123-103 paggiba sa Phoenix Suns.

Nagdagdag si Kevin Durant ng 22 points at nagtala si Draymond Green ng walo sa kabuuang 35 assists ng two-time defending NBA champions.

Ito ang pang-16 sunod na panalo ng Warriors laban sa Suns at ika-14 dikit nilang home victory laban sa Phoenix.

Sa Milwaukee, nag-lista si superstar forward Giannis Antetokounmpo ng 31 points at 15 assists at nagsalpak si Khris Middleton ng dalawang mahalagang three-pointers para ihatid ang Bucks sa 124-113 panalo laban sa New York Knicks.

Umiskor si Middleton ng 30 points tampok ang magandang 7-of-8 shooting sa 3-point range para sa panalo ng Milwaukee.

Nag-ambag si Eric Bledsoe ng 16 points habang may 13 at 11 markers sina center Brook Lopez at guard Malcolm Brogdon.

Ang triple ni Middleton sa huling 2:22 minuto ang nagbigay sa Bucks ng 116-110 abante na hindi na naputol ng Knicks.