Jerebko iniligtas ang Golden State
SALT LAKE CITY -- Nagbalik si Jonas Jerebko sa Utah at nakita ang kanyang hinahanap.
Sumugod si Jerebko sa basket para sa kanyang tip-in sa natitirang 0.3 segundo at akayin ang Golden State Warriors sa 124-123 pagtakas laban sa dati niyang koponang Jazz.
“My teammates knew this was a big game for me coming back here. I wanted to win and told them I really wanted this one,” sabi ni Jerebko, tumapos na may 10 points.
Naimintis ni Kevin Durant, humataw ng 38 points, ang kanyang running jumper, subalit sumugod si Jerebko, binitawan ng Utah bilang free agent matapos ang nakalipas na season para sa kanyang game-winning put-back.
“I took the ball out, so I knew I was going to give it to K.D. and I knew he was going to shoot it, so I just tried to get to the rim,” ani Jerebko.
Sumuntok sa hangin si Jerebko para sa selebrasyon niya at kaagad niyakap ng mga bago niyang teammates, kasama si Stephen Curry.
Nagdagdag si Curry ng 31 points, habang naglista si Draymond Green ng 14 points, 9 rebounds at 6 assists.
“Jonas was there in the right place at the right time. It was very fitting that he comes back here and gets the game-winning tip. We were very excited for him afterwards,” sabi ni Durant.
Kinuha ng Jazz ang 123-122 bentahe matapos ang tirada ni Jae Crowder sa huling 51.4 segundo.
Binanderahan ni Joe Ingles ang Utah mula sa kanyang 27 points, tampok ang pitong tres, habang may 19 markers si Donovan Mitchell.
Sa Minnesota, nagpasabog si Jimmy Butler ng 33 points sa loob ng 36 minuto para pamunuan ang Timberwolves sa 131-123 paggupo sa Cleveland Cavaliers.
Nagdagdag naman si star forward Andrew Wiggins ng 22 points.
Kumolekta naman si Love ng 25 points, 19 rebounds at 7 assists para sa Cleveland.
Sa Toronto, nagposte si Kawhi Leonard ng 31 points at 10 rebounds, habang nagdagdag si Serge Ibaka ng 21 points para igiya ang Raptors sa 113-101 panalo kontra sa Boston Celtics.
Umiskor si guard Kyle Lowry ng 15 points kasunod ang 14 at 11 markers nina Danny Green at Fred VanVleet, ayon sa pagkakasunod, para sa Toronto.
Kumamada si Kyrie Irving ng 21 points sa panig ng Boston.
- Latest