Hidilyn sasabak sa IWF event
MANILA, Philippines — Optimistiko si 2016 Rio Olympics silver medalist Hidilyn Diaz sa kanyang kampanya sa 2018 IWF World Championship sa Nobyembre 1-10 sa Ashgabat Olympic Complex Martial Arts Arena sa Turkmenistan.
Hawak ng Asian Games champion na si Diaz ang No. 1 spot sa women’s 53 kg. class sa world ranking ng International Weightlifting Federation (IWF).
Subalit wala sa isip ni Diaz ang maging kumpiyansa dahil alam niya na matinding laban ang kanyang haharapin.
Sa pagkakataong ito ay masisilayan sa aksyon si Diaz sa 55 kg. class kaya’t doble-kayod ang kanyang gagawin.
Magbabalik na rin sa senaryo ang powerhouse China at Kazakhstan na napatawan ng one-year suspension ng IWF dahil sa doping issue kasama ang Armenia, Azerbaijan, Belarus, Ukraine, Russia, Turkey at Moldova.
“Nandun ‘yung pressure pero laban lang. Kailangan kong ibigay ang best ko para makakuha ng magandang resulta. Hindi ako dapat maging kampante dahil magbabalik na ‘yung ibang teams like China and Kazakhstan,” ani Diaz.
Matinding paghahanda ang ginagawa ni Diaz kasama si Chinese coach Gao Kaiwen.
Bantay-sarado rin ang diet ni Diaz para masiguro na nasa tamang timbang at kundisyon siya.
“Kailangan balance ang diet para ma-maintain ‘yung weight and at the same time mag-gain ng power,” ani Diaz.
Maliban sa IWF event ay pinaghahandaan din ni Diaz ang 2019 Southeast Asian Games na idaraos sa Pilipinas gayundin ang 2020 Olympic Games sa 2020 sa Tokyo, Japan.
- Latest
