NU, UST nagsosyo sa liderato ng girls’ volleyball
MANILA, Philippines — Dumiretso ang reigning four-time girls champions na National University sa pagtatala ng 2-0 record matapos kunin ang 25-16, 22-25, 25-27, 25-12, 15-7 panalo laban sa Adamson University sa UAAP Season 81 high school volleyball tournament sa Blue Eagle Gym.
Naglista si Alyssa Solomon ng 19 points at 9 digs, habang nagdagdag sina Faith Nisperos at Sheena Toring ng tig-16 markers para sa Bullpups.
Nakabangon ang NU mula sa 1-2 pagkakaiwan at nalampasan ang nagawang 47 errors para talunin ang Adamson.
Tumipa naman si May Ann Nuique ng 6 blocks para tumapos na may 13 points sa panig ng Baby Falcons (1-2).
Samantala, kumamada si Imee Hernandez ng 13 points kasunod ang 12 hits ni Regina Jurado para igiya ang University of Santo Tomas sa 25-20, 25-23, 25-20 pagdaig sa Far Eastern University-Diliman at sumosyo sa NU sa liderato.
Winalis ng University of the East ang UP Integrated School, 25-19, 25-17, 25-22.
Sa boy’s division, tinalo ng NU ang FEU-Diliman, 25-20, 21-25, 25-16, 25-18, para itala ang 3-0 baraha, samantalang binigo naman ng Adamson ang Ateneo, 25-18, 25-7, 25-14 at pinadapa ng UST ang UE, 25-18, 25-17, 25-18.
- Latest
